ഇസ്ലാമും ശാസ്ത്രവും: അബ്ബാസ് ഇബ്നു ഫിർനാസും വ്യോമയാനവും

ഇന്ന്, വിമാനങ്ങളില്ലാത്ത ഒരു ലോകം സങ്കൽപ്പിക്കുക അസാധ്യമാണ്. വിമാനങ്ങളില്ലാതെ സമ്പദ്‌വ്യവസ്ഥയ്‌ക്കോ വിനോദസഞ്ചാരത്തിനോ നിലനിൽക്കാൻ പറ്റാത്ത വിധം വ്യോമയാന മേഖല ലോക ക്രമത്തെ മാറ്റി മറിച്ചിരിക്കുന്നു. നമ്മുടെ കുട്ടികൾ  പലപ്പോഴും പറക്കാൻ  സ്വപ്നം കാണുന്നു. ചിലപ്പോൾ അവർ പൈലറ്റായി ആ സ്വപ്നം സാക്ഷാത്കരിക്കും.

ഈ പോസ്റ്റിൽ, ഞങ്ങൾ വ്യോമയാനത്തിന്റെ പിതാവായ അബ്ബാസ് ഇബ്നു ഫിർനാസിനെ കുറച്ചാണ് ചർച്ച ചെയ്യുന്നത്.

അബ്ബാസ് ഇബ്നു ഫിർനാസ്

അബ്ബാസ് ഇബ്ൻ ഫിർനാസ് 810 CE-ൽ കോർഡോബയ്ക്ക് സമീപമുള്ള റോണ്ട എന്ന പട്ടണത്തിലാണ് ജനിച്ചത്. സ്പെയിനിലെ അൻഡലൂഷ്യയിൽ പെട്ടതായിരുന്നു ഈ പ്രദേശം. ശാസ്ത്രീയ പുരോഗതിക്ക് പേരുകേട്ട മുസ്ലീം സ്പെയിനിലാണ് അദ്ദേഹം തന്റെ ജീവിതകാലം മുഴുവൻ ചെലവഹിച്ചത്. ബാഗ്ദാദിലെ “ഹൗസ് ഓഫ് വിസ്ഡം” ന് ശേഷം ലോകത്തിലെ ഏറ്റവും ഉന്നത നിലവാരം പുലർത്തിയ സർവ്വകലാശാലകൾ മുസ്ലിം സ്പെയിനിലെതായിരുന്നു. 887-ൽ ഒരു വിമാനാപകടത്തെ തുടർന്നാണ് ഇബ്നു ഫിർനാസ് മരിക്കുന്നുന്നത്.

ഇബ്നു ഫിർനാസിന്റെ പറക്കുന്ന യന്ത്രം

ഇബ്നു ഫിർനാസ് തന്റെ ജീവിതം മുഴുവൻ ശാസ്ത്രത്തിനായി സമർപ്പിച്ചു. ഗണിതശാസ്ത്രം, ജ്യോതിശാസ്ത്രം, ഭൗതികശാസ്ത്രം എന്നിവയിൽ അദ്ദേഹം നിരവധി പുസ്തകങ്ങൾ എഴുതി. പുരാതന ഗ്രീക്കുകാരെയും ഈജിപ്തുകാരെയും പോലെ തന്നെ പറക്കാൻ കഴിയുന്ന ഒരു യന്ത്രം നിർമ്മിക്കുന്ന ആദ്യ മനുഷ്യനാകാൻ കൊതിച്ച  ഒരു മികച്ച എഞ്ചിനീയറായിരുന്നു അദ്ദേഹം.

തന്റെ മുൻഗാമികൾക്ക് വിരുദ്ധമായി, അദ്ദേഹം അക്കാര്യത്തിൽ വിജയിച്ചു. പറക്കൽ ഗവേഷണത്തിലൂടെ അത്ഭുതം സൃഷ്ടിച്ച അദ്ദേഹം അതിനെ കുറിച്ച് ഗ്രന്ഥങ്ങൾ എഴുതിരുന്നെങ്കിലും സ്പെയിൻ ഭരണം മുസ്ലിങ്ങൾക്കു  നഷ്ട്ടമായപ്പോൾ നശിപ്പിക്കപ്പെട്ട മുസ്ലിം അടയാളങ്ങൾക്കൊപ്പം അദ്ദേഹത്തിന്റെ അമൂല്യ കൃതികളും അഗ്നിക്കിരയാക്കപ്പെട്ടു. അദ്ദേഹത്തെയും അദ്ദേഹത്തിന്റെ വിമാനത്തെയും കുറിച്ചുള്ള ലഭ്യമായ  ഒരേയൊരു വിവരം മാത്രമാണ് ചരിത്രകാരന്മാർക്ക് വീണ്ടെടുക്കാൻ കഴിഞ്ഞത്.

പതിനഞ്ചാം നൂറ്റാണ്ടിൽ ലിയനാർഡോ ഡാവിഞ്ചി നിർമ്മിച്ച വിമാനം ആദ്യത്തെ വിമാനമായി പൊതുവെ അംഗീകരിക്കപ്പെടുന്നത് എന്തുകൊണ്ടാണെന്ന് ഈ സംഭവ വികാസങ്ങൾ വിശദീകരിക്കുന്നുണ്ട്. ഇന്നത്തെ ആധുനിക വിമാനങ്ങളുടെ (വിമാനങ്ങൾ, ഹെലികോപ്റ്ററുകൾ മുതലായവ) അടിസ്ഥാനം ഡാവിഞ്ചിയുടെ വിമാനം മാത്രമാണെങ്കിലും, അബ്ബാസ് ഇബ്‌ൻ ഫിർനാസിന് വിമാനവുമായി 9-ആം നൂറ്റാണ്ടിൽ തന്നെ പറക്കാൻ സാധിച്ചിട്ടുണ്ട് എന്ന യാഥാർഥ്യം മനസ്സിലാക്കേണ്ടതുണ്ട്. അദ്ദേഹത്തിന്റെ എയർഗ്രാഫ്റ്റിന്റെ മാതൃക എല്ലാം പ്രതിസന്ധികളും മറികടന്നു യൂറോപ്യർ സ്വന്തമാക്കുകയും ഡാവിഞ്ചിയടക്കമുള്ള ശാസ്ത്രജ്ഞർക്ക് പറക്കൽ ഗവേഷണത്തിന്റെ അടിസ്ഥാനമായി അത് മാറുകയും ചെയ്‌തത് ഒരു യഥാർഥ്യമാണ്.

ആദ്യത്തെ ഫ്ലൈറ്റ്

അബ്ബാസ് ഇബ്നു ഫിർനാസിന് സാധാരണയായി പ്രശ്നങ്ങളില്ലാതെ വിമാനത്തെ ഇറക്കാൻ കഴിയുമായിരുന്നു, പക്ഷേ ഇടയ്ക്കിടെ ചില പ്രതിസന്ധി നേരിടേണ്ടി വന്നു (പ്രത്യേകിച്ച് ലാൻഡിംഗ് സമയത്ത്). രണ്ട് അപകടങ്ങൾ കുപ്രസിദ്ധമായിത്തീർന്നു: കോർഡോബ നഗരത്തിലെ അദ്ദേഹത്തിന്റെ ഏറ്റവും വലിയ രണ്ട് അപകടങ്ങളായിരുന്നു അത്.

ആദ്യത്തെ പറക്കൽ നടന്നത് 852-ൽ ആണ്. ഇബ്നു ഫിർനാസ് മരപ്പലകകൾ കൊണ്ട് “ബലപ്പെടുത്തിയ” ഒരു കോട്ടിൽ സ്വയം പൊതിഞ്ഞു.  കോട്ട് തന്റെ “ചിറകുകൾ” ആയി അദ്ദേഹം കണ്ടു, ഒരുതരം ഗ്ലൈഡർ  പിടിപ്പിച്ചത് പോലെയായിരുന്നു അത്.ഇങ്ങനെ ശരീരത്തിൽ ചിറകുകൾ ഘടിപ്പിച്ചു മരപ്പലകൾ ഉപയോഗിച്ച് ശരീരത്തിന്റെ ബാക്കി ഭാഗങ്ങൾ പൊതിഞ്ഞ അദ്ദേഹം കോർദോവയിലെ ഏറ്റവും വലിയ മസ്ജിദിന്റെ മിനാരത്തിൽ കയറി താഴേക്ക് ചാടി. എന്നാൽ അദ്ദേഹത്തിന്റെ ഉദ്യമം ഫലം കണ്ടില്ല. ശരീരം പൊതിഞ്ഞ വസ്ത്രം ഒരു പാരച്യുട്ടായി പ്രവർത്തിച്ചതിനാൽ അദ്ദേഹം സാവകാശം ഭൂമിയിലേക്ക് പതിക്കുകയായിരുന്നു.അത് കൊണ്ട് തന്നെ വലിയ പരിക്കുകളില്ലാതെ അദ്ദേഹത്തിന്ന് നിലത്തെത്താൻ സാധിച്ചു.

രണ്ടാമത്തെ പറക്കൽ

അനുഭവത്തിൽ നിന്ന് പഠിച്ച ഒരാളായിരുന്നു ഇബ്നു ഫിർനാസ്. അതിനാൽ, തകർച്ചയ്ക്ക് ശേഷം അദ്ദേഹം ഉടൻ തന്നെ തന്റെ വിമാനം പുനർനിർമ്മിക്കാൻ തുടങ്ങി. പട്ട്‌ തുണിയിൽ പൊതിഞ്ഞ പരുന്തിന്റെ ചിറകായിരുന്നു ഗ്ലൈഡറുടെ ദിശയും ഉയരവും ക്രമീകരിച്ചിരുന്നത്.

രണ്ടാം പറക്കലിന് തയ്യാറെടുത്ത അദ്ദേഹം പറക്കൽ സമയം ജനങ്ങളെ അറിയിച്ചു ജബൽ അൽ അറസ് പർവതതിന്ന് മുകളിൽ എത്തി. അദ്ദേഹത്തിന്റെ പരീക്ഷണ പറക്കൽ കാണാൻ നിരവധി പേർ തടിച്ചുകൂടി. എന്നാൽ ആദ്യ പറക്കലിലെ അപകടം കണ്ട ജനങ്ങൾ അൽപ്പം ഭയത്തോടെയാണ് അവിടെ എത്തിച്ചേർന്നത്.

കൈകളിൽ ചിറകുമായി മലയിൽ നിന്ന് ചാടുന്നതിനുമുമ്പ് ഇബ്നു ഫിർനാസ് ഒരു പ്രസംഗം നടത്തി:

ഈ നിമിഷം ഞാൻ നിങ്ങളോട് എല്ലാവരോടും വിട പറയുന്നു. എന്റെ ചിറകുകൾ മുകളിലേക്കും താഴേക്കും ചലിപ്പിച്ചുകൊണ്ടേയിരിക്കും, ഇത് സാധാരണയായി ഒരു പക്ഷിയെപ്പോലെ പറക്കാൻ ഇടയാക്കും. എല്ലാം ശരിയാണെങ്കിൽ, എനിക്ക് സുരക്ഷിതമായി നിങ്ങളുടെ അടുത്തേക്ക് മടങ്ങാൻ കഴിയും.

ഗ്ലൈഡർ ശരീരത്തിൽ ഘടിപ്പിച്ചു പറക്കാൻ തുടങ്ങിയ അദ്ദേഹം പത്ത് മിനുട്ടോളം ആകാശത്ത് വലം വെച്ചു. പക്ഷെ തിരിച്ചിറങ്ങാനുള്ള ശ്രമത്തിനിടയിൽ തകർന്ന് വീണ അദ്ദേഹത്തിന്റെ മുതുകിൽ പരിക്ക് പറ്റി. അദ്ദേഹത്തിന്ന് കൂടുതൽ സമയം പറക്കാൻ കഴിയുമായിരുന്നില്ല. എങ്കിലും തന്റെ ശ്രമത്തിൽ അദ്ദേഹത്തിന്ന് വലിയ സംതൃപ്തിയുണ്ടായിരുന്നു.പറക്കാനുള്ള സാങ്കേതിക വിദ്യയിൽ ഗവേഷണം നടത്തിയിരുന്ന അദ്ദേഹം താഴെ ഇറങ്ങുന്നതിനെ കുറിച്ച് ആലോചിച്ചിരുന്നില്ല. പറക്കാൻ ചിറകുകളാണ് സഹായിക്കുന്നതെങ്കിലും ലാൻഡിംഗിന് വാൽ പരമപ്രധാനമാണെന്ന കാര്യം അദ്ദേഹത്തിന് അപ്പോഴാണ് ബോധ്യമായത്.

അപകടം ജീവിനെടുക്കുന്നു

തുടർച്ചയായ ശ്രമങ്ങൾക്കിടയിൽ അദ്ദേഹത്തിന്ന് ചില മുന്നേറ്റങ്ങൾ നടത്താൻ കഴിഞ്ഞു. എന്നാൽ തന്റെ അവസാന ശ്രമം വലിയ ദുരന്തത്തിൽ കൊണ്ടെത്തിച്ചു. പക്ഷേ  ആ അപകടം ലാൻഡിംഗ് സമയത്തല്ല സംഭവിച്ചത്, മറിച്ച് അദ്ദേഹത്തിന്റെ വിമാനത്തിനുണ്ടായ തകരാറായിരുന്നു അപകടകാരണം.

സ്വയം നിർമ്മിച്ച വിമാനത്തെക്കുറിച്ചുള്ള അദ്ദേഹത്തിന്റെ പുസ്തകങ്ങൾ ലിയനാർഡോ ഡാവിഞ്ചിയെപ്പോലുള്ള പിൽക്കാല ശാസ്ത്രജ്ഞർക്ക് വലിയ മുന്നേറ്റം നടത്താനുള്ള ഊർജത്തിന്റെ  സ്രോതസ്സായി മാറി. സുരക്ഷിതമായ ലാൻഡിംഗിന് വാൽ അനിവാര്യമാണെന്ന് ഡാവിഞ്ചി മനസ്സിലാക്കിയത് അങ്ങനെയാണ്.

എന്നിരുന്നാലും, ഇബ്‌നു ഫിർനാസ് മിക്ക ആളുകൾക്കും അജ്ഞാതനായി തുടരുന്നു. അക്കാലത്തെ ചരിത്രകാരന്മാരുടെ രചനകൾക്ക് വേണ്ടത്ര ശ്രദ്ധ ലഭിക്കാത്തതാണ് അത്തരം അവ്യക്തതയ്ക്കുള്ള ഏറ്റവും വലിയ കാരണം. അദ്ദേഹത്തിന്റെ പൈതൃകം ഉയർത്തിപിടിക്കേണ്ട സമയമാണിത്.